باسم يوسف يدافع عن محمد صلاح “صلاح لاعب كرة قدم وليس محاورًا”
كتبت:- بسنت محمد
رد فعل قوى ودعم مِن الإعلامى “باسم يوسف” لـ”مو صلاح” بعد تعرضه لمقارنات وإنتقادات كثيرة مِن الجمهور، عقب إنتشار فيديو قام بتنزيله على حساباته الرسمية “فيسبوك “و “انستجرام” و”إكس “
ذكر محمد صلاح خلال الڤديو “أنه يجب أن تتوقف المجازر فالعائلات تتقطع أوصارها”.
وختم محمد صلاح الفيديو قائلاً : “أناشد جميع قادة العالم للتكاتف معًا، لمنع وقوع المزيد مِن المذابح للأبرياء و يجب على الإنسانية أن تسود”.
وذكر أيضًا خلال الفيديو: “أن كل الأرواح مقدسة ويجب إيقاف المجزره بإسم الإنسانية”.
وبعد هذا التصريح شعر الجمهور أن موقف صلاح ليس مؤيدًا أو معارضًا إنما هو محايد وهذا ما أثار غضب الكثير مِن رواد السوشيال ميديا وكان سبب تعرضه للهجوم.
ولهذا السبب قام الإعلامى باسم يوسف بنشر عبر حسابه الشخصى ” فيس بوك” صورة له هو و محمد صلاح داعمًا له قائلاً: “أنا شفت الصورة دى فى كذا صفحة مع تعليق: محمد صلاح متصور مع فخر العرب؛ ده غير بوستات أخرى كتيرة جدًا يا إما بتقارن لقائى مع الفيديو بتاعه أو بتقلل و تتريق عل فيديو صلاح.
وأضاف قائلًا: “طيب فى كذا معلومة من المفترض فى العالم طبيعى إن لاعب الكرة أو حتى الكوميديان يكونوا فى الصفوف الأولى للدفاع عن القضايا الإنسانية، و ده دور وسائل الاعلام و السبب أن اللى في بيحصل غير كده أن الإعلام بيفشل فى ده، بل و بيزيد الأمور سوءًا فتتجه الناس للأشخاص الناجحين فى مجالهم، عشان يغطوا على فشلهم فى مجال مش بتاعهم، و ده أول السكة فى إننا بنظلمهم معانا، صلاح لعيب كورة لا يتدخل فى السياسة مِن أول يوم، ولا إحتفاله بالكريسماس مش رسالة سياسية، الإحتفال بأى مناسبة ده نشاط إنسانى بحت و لا يجب أن تقارن صورة جنب شجرة كريسماس أو حلويات المولد بوضع رمز أو علم للتضامن.
تعرف أيضاً علي – حماقي يعلن تبرعه بكل أرباح حفلاته لصالح الهلال الأحمر لدعم فلسطين
وأكمل: “تعزيته فى موت ملكة دولة إنجلترا هو أيضًا فعل إنسانى وليس سياسى؛ صلاح أو أى لاعب كرة قدم لو كان بيلعب فى دوريات الخليج و لاقدر الله لو ملك أو أمير أو شيخ أو حاكم الدولة أو الامارة أو المحافظة اللي فريقه بيلعب له توفاه الله كان هيكتب تعزية برضه؛ لأن ملكة إنجلترا عند الإنجليز اللى بيلعب عندهم، مكانتها فى قلوب ناس كتير جدًا زى مكانة هذا الملك أو الأمير فى قلب شعبه، فده بروتوكول وليس فعل سياسى.
وأضاف: ” انك تقارن فيديو محمد صلاح بالقائي هو الصراحة فيه ظلم شديد جدا لأن طلاقة اللغة مش شغلة محمد صلاح ولأن أيضا الكلام مش شغلة صلاح ،لا صلاح هيعرف يتكلم و يحاور زيي و لا أنا أقدر ألعب كورة زى محمد صلاح؛ يا جدعان ده أنا أكبر إنجازاتى فى الكرة إنى عملت 3 عمليات غضروف و أنا عندي ركبتين إتنين بس! ده أنا خدت كبارى بعدد شعر راسى، و لو على اللغة صلاح اللى مادخلش مدارس لغات زيي بيتكلم إيطالى، وأنا أصلا معرفش كلمتين إيطالى على بعض”.
واكمل حديثه قائلًا: “صلاح بالإنجليزى المكسر و الأداء الفلات أو المخطوف زى ما ناس وصفته، الأداء السيء ده عمل ملايين المشاهدات والتفاعلات ؛كونه بقى أن الكلام مايع، مافيش إدانة واضحة خالص، مسك العصاية من النص، قصف الجبهات مش دور محمد صلاح خالص؛ وأصلا هو فيديو غير موجه لينا هو فيديو بسيط مِن غير عياط ومِن غير نرفزة ومِن غير شتيمة ومِن غير إدانات و عياط وشجب و دموع لكن يوصل برة و يغير صوت واحد ده أبرك وأفضل بكتير”.
وأضاف “محمد صلاح هو ملهم لأجيال كتيرة جدا قصة كفاح وتعب غير مسبوقة على الإطلاق ، راجل بيتبرع فى السر أكتر مِن العلن، فاتح بيوت ناس كتير أنا و أنتم مش عارفين عددها، واحد زي ده نخسره ليه؟ عشان ما شفاش غليلك فى قضية بقالها ييجي ١٠٠ سنة، أعتى الأنظمة وأكبر الدول فشلوا فيها؟ أتأخر؟ ياسيدي المهم إنه وصل؛ مش قوى بما فيه الكفاية؟ اه بالنسبالك، لكن بالنسبة لفئة كبيرة من الناس قوى قوى دى ممكن يكون أول مرة يسمعوا فيها عن القضية؛ الدنيا برة مختلفة خالص الوطن العربي عندنا بس ده له بوست لوحده”.
وأختتم حديثه: “فاكرين لما صلاح نزل صورته فى القدس و كتب تضامن؟ إتشتم برضو، طيب لما يبقى عندنا واحد بوزن صلاح و كل شوية نشتمه عشان ماعملش اللى أحنا عشمانين فيه، طيب على الأقل لو ما شجعناش صلاح مش لازم ندوس عليه؛ صلاح مش المفروض يكون هو هدف لغضبك.
وأضاف: “أنا حصل معايا كده وعشت فترة زى دى وقالولى ساكت ليه، ما تقول زى فلان ما تعمل زى فلان؛ كل واحد و حساباته ظروفه، لا يكلف الله نفسا إلا وسعها، كل واحد أدرى بالضغوط اللى واقعة عليه، بلاش نكون إحنا كمان سبب زيادة فى الضغط عليه .
وأختتم قائلًا: “فى الأخر كل واحد و رأيه، كل واحد يحب ويكره اللى هو عايزه، لو حبيت صلاح أو كرهته أنت حر، البوست ده مش هيغير حاجة؛ ودى صورتى مع فخر العرب محمد صلاح”.
