لافينيا نادر ل YMC مبسوطة بنجاح المسلسل ودوري في فيلم شماريخ هيكون مفاجأة
ياسمين:- أحمد سيف
نجحت الطفلة لافينيا في تقديم شخصية “دنيا” في مسلسل صوت وصورة، وأحدثت تفاعل كبير علي السوشيال ميديا بسبب اتقانها للدور، وتعبر عن سعادتها بالمشاركة الثانية لها مع النجمة “حنان مطاوع”.
اكتشفها والدها الفنان “نادر كمال” أثناء تدريبة في ورشة نقابة المهن التمثيلية، وشاركت معه أول أعمالها في مسلسل نقل عام.
كلمينا عن بداية دخولك التمثيل
_ بابي كان بيمثل زمان بس ساب التمثيل بسبب سفره للخارج وظروف شغله ولما فكر يرجع التمثيل دخل ورشة نقابة المهن التمثيلية وكان بيحفظ مونولوجات ومشاهد صعبة فى الورشة واتفاجئ أني حفظتهم وأما كان بيمثل فى مسلسل “نقل عام” كانوا محتاجين طفلة فعرض على المخرج فيديو تمثيلي ليا فوافق وأعجب بيا جدا بعد أول مشهد وكل الممثلين وشركة الإنتاج فزودوا لى مشاهد واسمي اتكتب فى تتر المقدمة مع الأبطال رغم أن كان أول مرة أقف قدام كاميرا اصلا بس الحمد لله إحدى مشاهدي فى المسلسل كانت ترند واستاتس على الواتس والتيك توك.
ايه الشبه بين شخصيتك وشخصية دنيا؟
_ حبها لمامتها، وبحب النجمة حنان مطاوع زي ما مامتي وهي بتحبني زي بنتها.
بما أن ده تانى عمل ليكي مع النجمة حنان مطاوع اتعلمتي ايه منها؟
_ اتعرفنا على بعض فى مسلسل سره الباتع وحبيتني علشان كده رشحتني فى مسلسل صوت وصورة بس طبعا ما اتقابلناش فى مسلسل سره الباتع غير مرتين لأني بجسد دورها وهي صغيرة لكن فى مسلسل صوت وصورة أحنا فعلا كأننا عايشين مع بعض واتعلمت منها حاجات كتير أوى زى التواضع والاحترام وحب الناس والتركيز أوى فى المشاهد.
تعرف أيضاً علي – فدوي عابد ل Ymc محظوظه جدا إني قدمت شخصية مركبة بالشكل ده
ايه الصعوبات التي واجهتك في شخصية دنيا وازاي حضرتي للدور؟
_ الصعوبات كانت في مشاهد العياط لازم أحافظ على نفس الاحساس فى الوقت اللى بيتم فيه وقف التصوير، وطبعا كان ممكن المشهد يتصور من ٤ زوايا مختلفة.
لكن بصراحة النجمة حنان مطاوع والمخرج محمود عبد التواب( توبة ) كان لهم فضل كبير فى التركيز والحفاظ على نفس الاحساس.
وحضرت للدور ان اول حاجة بابي قرأ لى الاسكريبت بتاع العمل كله مش دوري بس علشان أبقى فاهمة كل أحداث المسلسل علشان أمثل المشهد بالطريقة اللى تتناسب مع تسلسل الأحداث وبجد أنا كنت حاسة الشخصية دي أوي، أتدربت على كل مشهد لوحده وبعدين المخرج عمل لكل كرو العمل بروفة ترابيزة قبل التصوير وبطولة ترابيزة مرة ثانية بيني وبين النجمة حنان مطاوع بس علشان يقول لي كل الملاحظات المهمة فى المشاهد اللى بيننا.
احكيلنا عن كواليس فيلم شلبي، وشماريخ؟
_ فيلم شلبي من أصعب الأدوار اللى مثلتها لأنه كان دور بطولة وفى نفس الوقت دور طفلة عندها صدمة نفسية خليتها مش بتتكلم فطبعا عشان أمثل طول الفيلم من غير ولا كلمة وكل التمثيل معتمد على ريأكشنات كان صعب جدااا
لكن فيلم شماريخ كان الإرهاق فى صعوبة المشاهد وخصوصا الاكشن والفيلم أتصور تقريبا فى سنة ونصف بس أحلى حاجة فى الفيلم أنه دور مفاجآة وفعلا مختلف تماما عن كل اللى عملته قبل كده وأنا بعتبر ان المخرج أ/ عمرو سلامة “أكتشفني من اول وجديد فى فيلم شماريخ”.
صوت وصورة جمعك بفنانين كتير في مشاهدك كمان زي عمرو وهبه وصدقي صخر ووليد فواز ازاي كانت الكواليس معاهم؟
الحمد لله كلهم كانوا بيحبونى اوى و أعجبوا بها من بروفة الترابيزة اللى اتعملت قبل التصوير، كنت زعلانة أن مفيش مشاهد جمعتني مع النجم “عمرو وهبة” في البداية لكن الحمد لله فى النصف الثاني كان فيه مشاهد مشتركة بيننا.
أما بقى النجم “صدقي صخر” كان بيقولى أنتي شطورة اوى وحابب اسمي أوى وكان فيه فيديو نزلته واحنا بنلعب مع بعض فى كواليس مشهد زيارتي لماما فى القسم لما اتقبض عليها ثاني مرة.
أما بقى النجم وليد فواز هو شخص طيب جدا وبيحبنى اوى ودايما بيدعي ان ربنا يوفقنى و يشجعني ويقول لي أنتي هتبقى أكبر نجمة.
تعرف أيضاً علي – حوار YMC-News مع الانفلونسر المصرية دكتورة كاميليا ناصر
بعد حوالي 7 أعمال ليكي، ايه أكتر شخصية حبيتها؟
_ شخصية سماح فى فيلم شماريخ لأنها مفاجآة بجد وهتبقى السبب ان الناس والمخرجين يعرفوا أني ممكن أعمل أدوار مختلفة وجديدة
مين الفنان أو الفنانة اللي نفسك تمثلي معاهم؟
_ كتير أوى .. كريم عبد العزيز، أحمد عز، أحمد السقا، أحمد حلمي، تامر حسني، منى زكي، ودينا الشربيني.
نجح مسلسل صوت وصورة وأحدث ضجة على مواقع التواصل الإجتماعي ليصبح حديث الجمهور نظرا لأهمية القضية “التحرش”
أبطال العمل: حنان مطاوع، صدقي صخر، عمرو وهبة، مراد مكرم، نجلاء بدر، وليد فواز، ولاء الشريف، رامي الطمباري، وفدوى عابد والعديد من النجوم وهذا العمل من تأليف محمد سليمان عبد المالك وإخراج محمود عبد التواب
