أم فايا ل Ymc News “الأم بالنسبة لأولادها أفضل منصة” وممتنه لحب الناس
كتبت :- ياسمين أحمد سيف
اشتهرت سيرة يوسف بشكل كبير مؤخرا عبر مواقع التواصل الإجتماعي لتتصدر مواقع البحث وتصبح الأم الأشهر للجميع، والتي تعرف إعلامياً بإسم أم فايا.
تخرجت من جامعة بنها قسم إذاعة وتلفزيون سنة 2016 كانت تسعي دائما في إظهار موهبتها للجميع إلا أن أصبحت مؤدية صوتية مميزة في مجالها.
تعلق بها الجمهور بسبب سلاسة إلقائها واللابقاة الحوارية وطريقة سردها حتى وإن كان الموضوع شديد البساطة… ومع بداية عام دراسي جديد لإبنتها فايا… أصبحت صاحبة أشهر لانش بوكس في الوطن العربي.
🛑امتي كان أول ظهور ليكي علي السوشيال ميديا وازاي جاتلك الفكرة؟
_ كان وقت كورونا… وقررت انزل فيديو تبع شغلي “كتاب صوتي” وكنت متوقعة أنه هينجح بس محصلش لدرجة إني قررت اني مش هكمل… وبعد ما ولدت دخلت في اكتئاب ما بعد الولادة بجانب أن والدي كان بيمر بأزمة صحية شديدة… لكن ال Therapist قالي إني علاجي هو إني أعمل أكتر حاجة بحبها ونصحني اني اعمل فيديوهات واتكلم… وكان وقت نتيجة الثانوية العامة فقررت اتكلم عن تجربتي في الثانوية العامة ومكنتش متوقعة أن الڤيديو يصل لمليون مشاهدة.
🛑مع أو ضد مصطلح التربية الحديثة؟ وهل التربية أصبحت أصعب مع ظهور السوشيال ميديا؟
_ من وجهة نظري …مفيش حاجه اسمها تربية جديدة وقديمة التربيه هي تربية، ابن الوز عوام اللي أنت بتعمله أولادك يتعلموا منك… بتعمد إني اخلي فايا تغني معايا أو تقول معايا مقطع صوتي خاص بالأطفال بحيث أن الطفل يتعلم أو يحب يقول زيها… بكون حريصة أن الفيديو ده هيدخل الأسرة فلازم يناسب كل أفرادها… وطبعاً التربية صعبة… ولكن “الام تقدر تكون لأولادها أفضل منصة”.
تعرف أيضا علي…خلال أسبوع واحد – فيلم A Haunting In Venice تزداد إيراداته بمليون دولار
🛑نظرا لشدة حب الجمهور لي فايا هل بتفكري تقللي ظهورها خوفاً عليها؟
_ فايا بتظهر ثواني في أي فيديو بس الحمدلله الناس حبيتها جدا… وأكيد بخاف عليها ولو حسيت أن ظهورها هيأذيها لقدر الله مش هظهرها ولو وجودي ع السوشيال ميديا أصلا هيضرها مش هكمل.
🛑ايه أكتر حاجه فايا شبهك فيها لما كنتي صغيرة؟
_ هي واخده مني كل حاجه تقريبا ماعدا الشكل فايا نفس طباعي وريأكشناتي وحركاتي… نفس الروح بالظبط وكمان احنا الاتنين نفس البرج “الجدي”.
🛑مين دايما بيشجعك تكملي باستمرار ؟
_ اللي بيشجعني هو اكتر شخص كان رافض ظهوري من البداية وخايف عليا جدا، هو جوزي “محمود” بقي النهاردة هو أكتر شخص داعم ليا لدرجة إني لو لقيت كومنت سئ ممكن اقول لأ مش هكمل… ويفضل يقولى متتأثرش بالكلام ده وكملي اللي بتحبيه متخليش كلام أي حد يمنعك من الاستمرار والسعي.
🛑تحبي تقولي ايه للجمهور اللي اتعلق بيكم في فترة قصيرة؟
_ احب أقول إنه مش بس شكرا لأ… أنا عاوزة اقولهم إني ممتنه للحب الكبير اللي بشوفه منكم ليا ولفايا بالأخص لأن أن حد بيحب فايا دي بالنسبالي حاجة كبيرة جدا من حبهم ليا… مبسوطة بالحب والتعلق ده برغم أنهم ميعرفونيش بشكل شخصي.
🛑وجهي رسالة لفايا تشوفها لما تكبر
_ عاوزة أقولها إني فخورة بيها جدا مش بحاجة هي بتعملها لأ بوجودها نفسه لأنه أكبر قوة ليا واتمني تكون سوية وراقية ومعندهاش عقد أو مشاكل مع أهلها… ولما تكبر تكون فخورة بيا وتفهم إني بعمل كل حاجه علشانها.
النجاح لا يعرف المستحيل ولا يوجد مستحيل لمن يسعى… فالمحاولة هي أولي خطوات النجاح… ونجاح سيرة يوسف لم يتعلق فقط بإبنتها الجميلة التي خطفت الأنظار… بدون موهبتها لم استطاعت أن تدخل قلوب الملايين.
